एजेन्सी : भेनेजुएलाका राष्ट्रपति निकोलस मादुरोले आफ्नो देशसँग क्यारेबियन क्षेत्रमा तैनाथ अमेरिकी सेनाको गतिविधिको प्रतिरोध गर्नका लागि रूसमा निर्मित करिब ५ हजार म्यान–पोर्टेबल सतहदेखि हावामा प्रहार गर्न सकिने एन्टी–एयरक्राफ्ट क्षेप्यास्त्र भएको बताएका छन् ।
उनका अनुसार भेनेजुएलाको हवाई सुरक्षालाई सुदृढ पार्न यी क्षेप्यास्त्रहरू ‘शान्ति सुनिश्चित गर्नका लागि प्रमुख हवाई रक्षा स्थानहरूमा’ तैनाथ गरिएको हो । उक्त मिसाइल प्रणालीलाई रुसमा ‘इग्ला–एस’ भनिन्छ, जसले विशेषगरी कम उड्ने विमानहरू खसाल्न सक्ने क्षमता राख्दछन् ।
अमेरिकी पक्षले भने क्यारेबियनमा गोप्य रूपमा लडाकु विमान र नौसेनाका जहाजहरू तैनाथ गरी त्यसलाई ‘लागू पदार्थ नियन्त्रण प्रयास’ का रूपमा व्याख्या गरेको छ । अमेरिकाले हालसम्म भेनेजुएलाबाट लागुऔषध बोकेको कम्तीमा आठवटा जहाज नष्ट गरेको दाबी गरेको छ ।
तर, राष्ट्रपति मादुरोले यसलाई आफ्नाविरुद्ध वासिङ्टनले चलाइरहेको ‘सरकार परिवर्तन अभियानको अभ्यास’ का रूपमा चित्रण गर्दै ती तैनाथीको कडा निन्दा गरेका छन् । वरिष्ठ सैन्य अधिकृतहरूको उपस्थितिमा आयोजित टेलिभिजन समारोहमा उनले भेनेजुएलाको सार्वभौमिकताको रक्षा गर्न सेना सदैव तयार रहेको बताएका छन् ।
अमेरिकी रक्षा मन्त्रालय पेन्टागनले कङ्ग्रेसलाई पठाएको प्रतिवेदनमा अमेरिकाले हाल ल्याटिन अमेरिकी लागुऔषध कार्टेलहरूसँग ‘सशस्त्र द्वन्द्व’मा रहेको उल्लेख गरेको छ । ती समूहहरूलाई ‘आतंकवादी संगठन’का रूपमा तोकिएको छ भने तस्करीमा संलग्न व्यक्तिहरूलाई ‘गैरकानुनी लडाकु’ भनिएको छ । पुष्टि भएका तस्करहरूलाई लक्षित गरे पनि संक्षिप्त हत्या अन्तर्राष्ट्रिय कानुनविपरीत मानिन्छ भन्दै विज्ञहरूले भने यस्ता कार्यहरू कानुनी दृष्टिले विवादास्पद भएको बताएका छन् ।
यसैबीच, अमेरिकी राष्ट्रपति डोनाल्ड ट्रम्पले क्यारेबियनमा गरिएको तैनाथीका कारण समुद्री तस्करीमा उल्लेखनीय कमी आएको र अब भूमिगत लागुऔषध सञ्जालहरूलाई आक्रमण गर्न अमेरिकी सेना तयार रहेको बताएका छन् ।
विशेषतः कोलम्बियाले अमेरिकी कदमप्रति असन्तुष्टि जनाउँदै वासिङ्टनमा रहेका आफ्ना राजदूतलाई फिर्ता बोलाएपछि क्षेत्रीय तनाव झन् बढेको छ । कोलम्बियाका वामपन्थी राष्ट्रपति गुस्ताभो पेट्रो र राष्ट्रपति ट्रम्पबीचको सम्बन्ध यस घटनापछि झन् तिक्त बनेको छ ।
