काठमाडौं : अखिल नेपाल आदिवासी जनजाति महासङ्घले आज ३१ औँ विश्व आदिवासी दिवस भव्य रुपमा सम्पन्न गरेको छ। काठमाडौँको घट्टेकुलोस्थित सम्पन्न उक्त कार्यक्रमका प्रमुख अतिथि क्रान्तिकारी कम्युनिस्ट पार्टी नेपालका महासचिव सीपी गजुरेल गौरव हुनुहुन्थ्यो। एक समारोहका बीच गौरवले पानसमा बत्ती बालेर उक्त ३१ औ आदिवासी दिवस समारोहको उद्घाटन गर्नुभएको हो।
कार्यक्रमका प्रमुख वक्ता समेत रहनुभएका गौरवले नेपालमा संघीय जनगणतन्त्रको स्थापना भएपछि मात्रै आदिवासी तथा जनजातिहरूको वास्तविक मुक्ति हुने बताउनुभयो। जनजाति समस्या पनि वर्गीय समस्या भएकाले जनजातिहरूका आन्दोलनलाई वर्गीय आन्दोलनसँग जोडेर लैजानुपर्ने उहाँले बताउनुभयो । अर्को प्रसङ्गमा गजुरेलले संयुक्त राष्ट्रसङ्घले धेरै विषयमा र प्रसङ्गमा दिवस मनाउने गरेपनि संयुक्त राष्ट्रसङ्घले घोषणा गरेका खास खास दिवसहरूलाई आफ्नो पार्टीले पनि मनाउने गरेको बताउँदै गजुरेलले आदिवासी जनजातिहरूको समस्या गम्भीर समस्या भएको र यो वर्गीय मुद्दासित समेत जोडिने भएकाले हामीले मनाउनु परेको हो भन्नुभयो । नेपालमा सबैले क्रान्तिकारी आन्दोलन छोडिसकेको हुँदा क्रान्तिकारी आन्दोलनलाई अगाडि बढाउने जिम्मा क्रान्तिकारी कम्युनिस्ट पार्टी नेपालको काँधमा आएको समेत गजुरेलले स्पष्ट गर्नुभयो।
अखिल नेपाल आदिवासी जनजाति महासङ्घका केन्द्रीय सल्लाहकार तथा क्रान्तिकारी कम्युनिस्ट पार्टी नेपालका पोलिट ब्युरो सदस्य परि थापाले उक्त अवसरमा बोल्दै आदिवासीहरू भनेका वास्तवमा प्रकृति प्रेमी हुन् भन्ने कुरा स्पष्ट गर्नुभयो। त्यस सन्दर्भमा उहाँले विगतमा आदिवासी जनजातिको कुरा गर्दा राज्यद्रोहको मुद्दासम्म लाग्ने स्थिति रहेको र अहिले परिस्थिति बदलिएको समेत बताउनुभयो । उहाँले जनताको बीचमा गएर संगठनको निर्माण गरेर नै जनजाति आन्दोलनलाई अगाडि बढाउन सम्भव हुने समेत बताउनुभयो । अर्का वक्ता अखिल नेपाल आदिवासी जनजाति महासङ्घका केन्द्रीय सल्लाहकार तथा क्रान्तिकारी कम्युनिस्ट पार्टी नेपालका पोलिट ब्युरो सदस्य सीताराम तामाङले कार्यक्रम बनाएर जनताको बीचमा जानुपर्ने आवश्यकता माथि जोड दिनुभयो । उहाँले आदिवासी जनजाति माथिको विभेदलाई राष्ट्रिय विभेद भन्दै यो राष्ट्रिय विभेदलाई अन्त्य गर्नका निमित्त कम्युनिष्ट पार्टी नै अगाडि सर्नुपर्ने पनि बताउनुभयो। उहाँले नयाँ जनवादी क्रान्तिको आधारभूत वर्ग आदिवासी जनजातिहरु हुन् समेत भन्नुभयो । क्रान्तिका आधारभूत वर्गका बीचमा गएर नै हामीले क्रान्तिकारी आन्दोलनलाई अगाडि बढाउन सक्छौं । सोही सन्दर्भमा तामाङले अहिले मूलवासी र आदिवासी जनजातिको बीचमा भिन्नता छ भनेर बखेडा झिकिरहेको सन्दर्भमा मूलबासी र आदिवासीमा भिन्नता छ फरक छ भनेर धेरै विवाद गर्न नहुने समेत बताउनुभयो। उहाँले आदिवासी र जनजाति शब्द आन्दोलनले स्थापित गरेको शब्द हुँदा आदिवासी जनजाति भन्न हिच्किचाउन नहुने समेत बताउनुभयो। सो सन्दर्भमा विक्रम सम्वत १९३६ मा गोरखा भाषालाई नेपाली भाषा भनेर जुद्धशमशेरको पालामा लेखिन थालेको इतिहाससमेत स्मरण गर्दै सबै भाषाभाषीहरुको अधिकार र भाषाहरू संरक्षण हुनुपर्ने कुरामा समेत जोड दिनुभयो ।
अर्का वक्ता अखिल नेपाल आदिवासी जनजाति महासङ्घका सल्लाहकार कमल चौधरीले जातीय आन्दोलनलाई वर्गीय आन्दोलनसँग जोडेर लानुपर्ने आवश्यकतामा जोड दिनुभयो । त्यसैगरी महिला संगठनकी प्रतिनिधि तथा अखिल नेपाल जनसाँस्कृतिक महासंघकी गौरी देवकोटाले सबै उत्पीडित समुदायहरूको मुद्दालाई उठाउनु पर्ने आवश्यकता माथि जोड दिनुभयो । सम्पूर्ण जनवर्गीय संगठनको तर्फबाट अखिल नेपाल राष्ट्रिय स्वतन्त्र विद्यार्थी युनियन क्रान्तिकारीका केन्द्रीय संयोजक महेश श्रेष्ठले दिवसको शुभकामना दिनुभएको थियो।
त्यस अवसरमा क्रान्तिकारी कम्युनिस्ट पार्टी नेपालका पोलिट ब्युरो सदस्य तथा ९ नम्बर ब्युरो इन्चार्ज दिने शर्मा, क्रान्तिकारी कम्युनिष्ट पार्टी नेपालका १० नम्बर इन्चार्ज सुरेश श्रेष्ठ, क्रान्तिकारी युवा संगठन नेपालका संयोजक सूर्य तिमिल्सिना, प्राध्यापक संगठनको तर्फबाट प्राध्यापक डाक्टर जगदिशचन्द्र भण्डारी, खेलकुद महासङ्घका सूर्य भुजेल, उद्योग वाणिज्य सङ्घका शिव धिमाल लगायतको पनि कार्यक्रममा अतिथि आसन ग्रहण गराइएको थियो।
कार्यक्रममा शहिदहरूप्रति एक मिनेट मौन धारण गरिएको थियो । कार्यक्रममा सामना परिवारका कलाकार अनिसले हामी धर्ती पुत्र हौँ। हामी आदिवासी हौँ। हामी धर्ती पुत्र हौ भन्ने बोलको गीत समेत गाउनुभएको थियो। कार्यक्रमको अध्यक्षता अखिल नेपाल आदिवासी जनजाति महासङ्घका केन्द्रीय अध्यक्ष पवनमान श्रेष्ठले, सञ्चालन महासङ्घका केन्द्रीय महासचिव फोर्नाम्गेल मोक्तान र स्वागत महासंघका केन्द्रीय कोषाध्यक्ष भरत बुर्जा मगरले गर्नुभएको थियो।
कार्यक्रम सुरु हुनुभन्दा पहिले दिउँसो १२ बजे पुरानो बानेश्वर देखि इच्छुक प्रतिष्ठानको सभा हलसम्म जुलुस गरिएको थियो। अखिल नेपाल आदिवासी जनजाति महासङ्घ जिन्दाबाद, ३१ औ विश्व आदिवासी दिवससफल पारौं , विकासको नाममा पहिचान मेट्न पाइँदैन लगायतका नारा लगाइएको थियो ।
