रुपन्देही : क्रान्तिकारी कम्युनिष्ट पार्टी नेपाल ५ नम्बर ब्युरोको आयोजनामा बुटवलमा आइतबार जनसभा गरिएको छ ।
जनसभामा प्रमुख अतिथि पार्टीका स्थायी समिति सदस्य कृष्णराज पौडेलले सुशिला कार्की नेतृत्वको वर्तमान साम्राज्यवादी तथा विस्तारवादीहरुको कठपुतली सरकारलाई अपदस्त गरी साम्राज्यवाद र विस्तारवादविरोधी सच्चा देशभक्त, प्रगतिशील तथा क्रान्तिकारी शक्तिहरुको नेतृत्वमा संयुक्त स्वाधीन सरकारको गठन गर्न सार्वजनिक आव्हान गर्नुभयो । उहाँले भष्ट्रचारी पार्टीहरुका कारण जेनजी बिद्रोह भएको उल्लेख गर्दै अब क्रान्तिकारी बिद्रोहमार्फत देशको राष्ट्रिय स्वाधीनताको रक्षा गर्न आवश्यक रहेको बताउनुभयो ।
कार्यक्रममा बामपन्थी नेता प्रेम सुवेदीले स्वाधीन संयुक्त सरकारको पक्षमा देश एकताबद्ध हुने समय आएको चर्चा गर्नुभयो । सो अवसरमा क्रान्तिकारी कम्युनिष्ट पार्टी नेपालका पोलिटब्यूरो सदस्य कृष्ण केसीले नयाँ जनवादको खुड्किलो पार गरेर बैज्ञानिक समाजवादमा देशलाई लैजानुको बिकल्प नभएको उल्लेख गर्नुभयो ।
कार्यक्रममा पार्टीका बैकल्पिक पोलिटब्यूरो सदस्य दीपक पौडल, पार्टीका केन्द्रीय सदस्य समेत रहनुभएका क्रान्तिकारी किसान महासंघ नेपालका सचिव क्षेत्र बहादुर थापा, क्रान्तिकारी महिला संगठन नेपालकी नेतृ लक्ष्मी न्यौपानेलगायतले बोल्दै वर्गीय मुक्तिका लागि सबै तह र तप्काबीच कार्यक्रम लिएर पुग्नुपर्ने बताउनुभयो ।
कार्यक्रमको अध्यक्षता पार्टीका बैकल्पिक पोलिटब्यूरो सदस्य एंव ब्यूरो सचिव जितामित्र सुनार , संचालन पार्टीका बैकल्पिक केन्द्रीय सदस्य तथा नवलपरासी जिल्ला सचिव रवि पाण्डेय र स्वागत पार्टीका केन्द्रीय सदस्य तथा रुपन्देही जिल्ला सचिव लक्ष्मीकान्त पौडेलले गर्नुभएको थियो ।
सभा शुरु हुनू पूर्व बसपार्कबाट निकालिएको जुलुस , पुष्पलाल पार्क , ट्राफिक चोक हुदै बीपीचोकमा पुगेर सभामा परिणत भएको थियो । जुलुसमा स्वाधीन संयुक्त सरकार गठन गर, राष्ट्रिय स्वाधीनताको रक्षा गरौ, कठपुतली सरकार खारेज गर जस्ता चर्का नाराबाजी समेत गरिएको थियो । क्रान्तिकारी कम्युनिस्ट पार्टी नेपालले बुटवलको बिपीचोक सहित महेन्द्रनगर, धनगढी सुर्खेत, घोराही, बागलुङबजार, पोखरा, भरतपुर, विदुर, काठमाडौं, धुलिखेल, विरगञ्ज, धनुषा, गाईघाट, धरान र विराटनगरमा जनसभाहरुको सम्पन्न गरेको जनाएको छ ।
